თიბისი GITI 2022-ის მხარდამჭერია

თიბისის მხარდაჭერით, რეგიონში ერთ-ერთი პირველი ტექნოლოგიური ღონისძიება ბრუნდება. საქართველოს კიბერუსაფრთხოებისა და ინფორმაციული ტექნოლოგიების განვითარების ღონისძიება - GITI 2008 წლიდან ტარდება და 1-2 დეკემბერს, სასტუმრო შერატონში გაიმართება.
წლევანდელი GITI ისეთი საკითხების განხილვას დაეთმობა, როგორებიცაა: ელექტრონული მმართველობა, ტექნოლოგიური ტრანსფორმაცია, IT ინოვაციები და განათლება, ფინტექი, ინფორმაციული და კიბერ უსაფრთხოება, მონაცემთა მართვა და სხვა.

GITI კონფერენცია უკვე მეთორმეტედ ტარდება და მისი მიმდინარეობისას ასევე ჩატარდება კონკურსი, რომლის მიზანია სხვადასხვა კატეგორიებში წლის საუკეთესო პროექტების გამოვლენა და დაჯილდოება, რაც ხელს უწყობს საჯარო და კერძო სექტორში ინოვაციური პროექტების განხორციელების წახალისებას.

GITI კონფერენცია ICT და IT ინოვაციების სფეროში რეგიონში ერთ-ერთი ყველაზე პირველი ღონისძიებაა, რომელსაც ტრადიციულად 20-ზე მეტი ქვეყნის წარმომადგენელი ესწრება. გასულ კონფერენციებში მონაწილეობდნენ მოქმედი და ყოფილი მინისტრები, უსაფრთხოების სააგენტოების ხელმძღვანელები, ადგილობრივი და საერთაშორისო ბიზნეს ინსტიტუტების უმაღლესი დონის მენეჯერები, ICT დარგის პროფესიონალი ექსპერტები, ბიზნესმენები და სხვა გამორჩეული სტუმრები.

„თიბისის მიზანია, იყოს რეგიონში მოწინავე ტექნოლოგიური კომპანია. ამიტომ ჩვენთვის უმნიშვნელოვანესია ისეთი პროექტების მხარდაჭერა, რომლებიც ავითარებენ და ზრდიან ცნობიერებას ციფრული ტრანსფორმაციის, GovTech, FinTech, ინფორმაციისა და კიბერუსაფრთხოების შესახებ. ციფრული და ტექნოლოგიური განვითარება საშუალებას გვაძლევს, საუკეთესო გამოცდილება შევუქმნათ მომხმარებელს და ამავდროულად გავაძლიეროთ თიბისის პოზიციები ტექნოლოგიური მიმართულებით,“ - ამბობს თიბისის ინფორმაციული ტექნოლოგიების დირექტორი, ბიძინა მაცაბერიძე.

კონფერენციის ორგანიზატორია ICT ბიზნეს საბჭო საქართველოს ეკონომიკისა და მდგრადი განვითარების სამინისტროს, საქართველოს იუსტიციის სამინისტროსა და ციფრული განვითარების სააგენტოსთან თანამშრომლობით.

კონფერენციის მხარდამჭერები არიან: Microsoft, Orient Logic, Greennet, Identomat, UK Aid, UNDP, Giz და სხვა საერთაშორისო კომპანიები.

კონფერენციის დეტალებისთვის ეწვიეთ ვებ-გვერდს - GITI2022